بنگلورو۔ کرناٹک میں حجاب کی وجہ سے ہونے والے تشدد کے واقعات کے پس منظر میں حالات ہنوز کشیدہ ہیں۔ پولیس نے اب تک 15 افراد کو گرفتار کیا ہے۔شیواموگا ضلع میں کرفیو کے احکامات کے باوجود چہارشنبہ کی صبح این ایس یو آئی کے ارکان فرسٹ گریڈ ڈگری کالج اور پی جی ریسرچ سنٹر میں داخل ہوئے۔ انہوں نے بھگوا دھواج یا بھگوا جھنڈا اتارا اور صبح ترنگا لہرایا۔ پولیس نے موقع پر پہنچ کر بھیڑ کو منتشر کیا۔ انہوں نے دونوں جھنڈوں کو اپنے قبضہ میں کرلیا ہے۔
حکام نے واضح کیا ہے کہ منگل کو شیو موگا کالج میں خالی فلیگ پوسٹ پر بھگوا دھواج لہرایا گیا تھا۔ انہوں نے ترنگا اتارنے کے بعد بھگوا دھوج لہرانے کی تردید کی ہے۔دریں اثنا، کچھ ہندو تنظیموں نے تشدد کی مذمت کے لیے باگل کوٹ ضلع کے بناہٹی قصبے میں بند کا اعلان کیا ہے ۔ذرائع کے مطابق محکمہ پولیس نے منگل کو ہونے والے تشدد کے سلسلے میں 15 افراد کو گرفتار کیا ہے اور انہیں شیوموگا اور باگل کوٹ اضلاع میں عدالتی تحویل میں بھیج دیا ہے جہاں حجاب کے تنازعہ نے فرقہ وارانہ رخ اختیار کرلیا ہے۔ریاستی ہائی کورٹ آج دوپہر اس معاملے پر سنوائی کر رہی ہے اور توقع ہے کہ بنچ شام تک حجاب پہننے کے بارے میں فیصلہ دے دے گی۔
ریاستی حکومت ریاست کی صورتحال پر تبادلہ خیال کے لیے کابینہ کااجلاس کررہی ہے۔ چیف منسٹر بسواراج بومئی ریاست کی صورتحال سے نمٹنے کے لئے کابینہ کے سینئر ساتھیوں سے تجاویز لیں گے۔وزیر تعلیم بی سی ناگیش نے کہا کہ ان لوگوں کے خلاف کارروائی شروع کی جائے گی جو ریاست میں حجاب کے سلسلے کو بڑھانے کے پیچھے ہیں۔ صرف چند طالبات ہی حجاب کا مطالبہ کررہی ہیں، وہ اپنی کمیونٹی کے لیڈروں کی بھی نہیں سن رہے ہیں۔ حجاب سے متعلق مظاہروں کے باوجود طلبہ کی حاضری میں کمی نہیں آئی۔
ریاست کے وزیر داخلہ آراگا جانیندرا نے کہا کہ حجاب کے سلسلے میں آگ بھڑکانے کی کوشش کی جا رہی ہے۔ انہوں نے کہا کہ تشدد کے سلسلے میں گرفتاریاں کی گئی ہیں اور وہ بعد میں تفصیلات بتائیں گے۔چیف منسٹر بسواراج بومئی نے آج صبح ایڈوکیٹ جنرل پربھولنگ ناواڈا کے ساتھ ہائی کورٹ میں پیش رفت پر تبادلہ خیال کیا۔ وزیر تعلیم بی سی نے وزیر اعلیٰ کو ریاست کی صورتحال سے بھی آگاہ کیا۔ ریاست کے ڈی جی اور آئی جی پی پروین سود اور بنگلورو کے پولیس کمشنر کمل پنت نے سی ایم بومئی سے ملاقات کی اور ریاست کی صورتحال کے بارے میں ایک ملاقات کی۔
محکمہ داخلہ کی اطلاع کے مطابق ریاست کے پانچ اضلاع کے 7 کالجوں میں تصادم اور پرتشدد واقعات پیش آئے۔ کرناٹک کے 19 اضلاع کے 55 کالجوں میں احتجاج کیا گیا ہے۔ہری ہارا پولیس نے حجاب کے سلسلے میں ہونے والے تشدد کے سلسلے میں چار مقدمات درج کیے ہیں۔ ہندو تنظیموں نے استاد منجوناتھ نائک پر حملے کی مذمت کرتے ہوئے بند کا اعلان کیا ۔ نائک پر لوہے کی سلاخوں سے حملہ کیا گیا اور ان کی حالت تشویشناک بتائی جاتی ہے۔
