حیدرآباد ۔ سالار جنگ میوزیم 16 سے 21 مئی تک انٹرنیشنل میوزیم ویک منائے گا، ان دنوں کے دوران میوزیم کے احاطے میں مختلف پروگرام منعقد کیے جائیں گے۔ سالار جنگ میوزیم کے ڈائرکٹر ڈاکٹر اے ناگیندر ریڈی نے کہا کہ وزارت ثقافت، حکومت ہند، 18 مئی کو بین الاقوامی میوزیم ڈے کو میوزیم کی طاقت کے موضوع کے ساتھ منانے کا اعلان کیاہے جس کے تحت حیدرآباد کی میوزیم میں بھی ایک ہفتہ طویل مختلف پروگرامس منعقد کئے جارہے ہیں ۔
انہوں نے زور دے کر کہا کہ عجائب گھر (میوزیم ) نہ صرف ثقافتی ورثے کا ذخیرہ ہیں بلکہ یہ تعلیمی مراکز بھی ہیں جو ماضی کی تاریخ، ثقافت اور روایات کے حوالے سے عوام کے علم اور معلومات میں اضافہ کرتے ہیں۔ تقریبات کی اہم خصوصیت کا تذکرہ کرتے ہوئے ڈائریکٹر ڈاکٹر ناگیندر نے کہا کہ سالارجنگ میوزیم نے معذور اور یتیم طلباء کو میوزیم کا دورہ کرنے کی دعوت دینے کا منصوبہ بنایا ہے۔
بین الاقوامی میوزیم ہفتہ کی تقریبات کے لیے منصوبہ بندی کی گئی مختلف تقریبات کے بارے میں تفصیلات بتاتے ہوئے ڈائریکٹر نے بتایا کہ میسج بورڈ کا آغاز ہوگا، نمائش ہوگی جس میں اب تک 75 اشیاء کی نمائش ہوگی / ریزرو کلیکشن سے جو ہندوستان کی آزادی کے 75 سال کی نشاندہی کرتی ہے، اسکول کے بچوں کو فنون کی تربیت، دستکاری، ڈرائنگ وغیرہ کی سہولت فراہم کی جارہی ہے ۔ بیدری بنانے اور لیکچر پر ایک روزہ ورکشاپ/ مظاہرہ، حیدرآباد آرٹ سوسائٹی کے 75 فنکاروں کی خصوصی آرٹ نمائش، بھاگیہ نگر فوٹو آرٹ کلب کے تعاون سے میوزیم آبجیکٹ کا فوٹوگرافی مقابلہ ہوگا۔
جیتنے والوں کو نقد انعامات دیے جائیں گے۔ اس کے علاوہ تلنگانہ کے لوک فنکاروں کے ثقافتی پروگرام بھی منعقد کیے جائیں گے۔ حیدرآباد آرٹ سوسائٹی کی صدر رمنا ریڈی،ان ٹیاچ کی حیدرآباد چیپٹر کنوینر انورادھا ریڈی نے بھی منصوبہ بند پروگراموں کے حوالے سے میڈیا سے خطاب کیا۔
