حیدرآباد ۔سیلاب سے متاثرہ افراد کو گریٹر حیدرآباد میونسپل کارپوریشن (جی ایچ ایم سی) کی جانب سے پیغامات موصول ہورہے ہیں کہ جس میں اطلاع دی جارہی ہے کہ 10،000 روپے کی امدادی رقم ان کے بینک کھاتوں میں جمع کردی گئی ہے لیکن متاثرہ افراد یہ جان کر حیران رہ گئے کہ ان کے بنک میں ابھی تک کوئی رقم جمع نہیں ہوئی ہے۔ جب سے جی ایچ ایم سی کمشنر کے نام سے پیغامات جاری کیے گئے ہیں وہ جی ایچ ایم سی کے دفتر کے چکر کاٹ رہے ہیں ۔
انتخابات سے قبل ریاستی حکومت نے متاثرین کومطلع کیا گیا تھا کہ وہ امدادی رقم 7 دسمبر سے عوام کے بینک کھاتوں میں جمع کردے گی لیکن ان کے بینک کھاتوں میں رقم جمع ہونے کے آثار نہیں ۔ روزانہ کم از کم 15 سے 20 افراد ہیڈ آفس پہنچ رہے ہیں اور شکایت کررہے ہیں کہ ان کے بینک اکاؤنٹ میں رقم جمع نہیں ہوئی ہےلیکن جی ایچ ایم سی کے عہدیدار مناسب جواب نہیں دے رہے ہیں۔ یہاں تک کہ سیکیورٹی گارڈز دفتر کے اندر ایسے افراد کو اعلی حکام سے ملاقات کی اجازت نہیں دے رہے ہیں۔ مایوس سیلاب متاثرین خالی ہاتھ گھر لوٹ رہے ہیں۔ ہزاروں سیلاب متاثرین کو ایسے پیغامات موصول ہوئے ہیں جس میں رقم بنک میں جمع کرنے کی اطلاع دی جارہی ہے ۔
سیلاب متاثرین گذشتہ چار دنوں سے جی ایچ ایم سی سے رابطہ کر رہے ہیں کیونکہ انہیں می سیوا مراکز یا جی ایچ ایم سی زونل کے دفاتر سے مناسب جوابات نہیں مل رہے ہیں۔ متاثرین میں سے ایک امداد کے لئے جی ایچ ایم سی عہدیدار کے پاؤں پر گر گیا لیکن فائدہ نہیں ہوا۔سیلاب سے متاثرہ اور مایوس افراد اپنی برہمی کا اظہار کر رہے ہیں کیونکہ انہیں جی ایچ ایم سی سے دھوکہ دہی کا احساس ہورہا ہے۔
