امراوتی: آندھراپردیش کے سابق وزیر وائی ایس وویکانند ریڈی کے سنسنی خیز قتل معاملہ میں سی بی آئی نے اپنی جانچ جاری رکھی۔سی بی آئی نے پُلی ویندلہ کے رہنے والے وائی ایس آرکانگریس کے ریاستی سکریٹری دیوی ریڈی شیواشنکر ریڈی سے کڑپہ ضلع میں پوچھ گچھ کی۔سمجھاجاتا ہے کہ وہ رکن پارلیمنٹ کڑپہ وائی ایس اویناش ریڈی کا قریبی ساتھی ہے۔اس کا نام ان 15مشتبہ افراد کی فہرست میں شامل ہے جو وویکانند ریڈی کی دختر نے اے پی ہائی کورٹ کو پیش کی تھی۔
وہ سی بی آئی کی ہدایت پر پوچھ گچھ کے لئے حاضر ہوا۔دیوی ریڈی واردات کے دن وائی ایس وویکانند ریڈی کے ارکان خاندان کے ساتھ مقام واردات پر موجود تھا۔ایس آئی ٹی نے بھی قبل ازیں اس سے پوچھ گچھ کی تھی۔مجرمانہ پس منظر رکھنے پر سنیتاریڈی نے ان کے والد کے قتل کے رول میں اس پر شبہ کیا جس کے بعد سی بی آئی کے عہدیداروں نے اس سے تفصیلی پوچھ گچھ کی اور سوال کیا کہ وہ وائی ایس خاندان کو کس طرح جانتا ہے اور اس کو وویکانند ریڈی کے قتل کی اطلاع کیسے ملی؟قبل ازیں سنیتا ریڈی نے عدالت سے کہا کہ شیوا نے قتل کے بعد دیگر مشتبہ افراد کے ساتھ ملاقات کی تھی۔سی بی آئی اس معاملہ کی مختلف زایوں سے جانچ کررہی ہے۔
