نئی دہلی ۔ ہندوستان اور چین سرحدی تنازعہ کو حل کرنے کے لیے اس ہفتے کے آخر میں کور کمانڈر سطح کی بات چیت کے 15ویں دور کے لیے تیار ہیں، وزارت دفاع کے ذرائع نے منگل کو بتایا۔کہا گیا ہے کہ ہندوستان اور چین نے باہمی طور پر 11 مارچ 2022 کو چوشول مولڈو میٹنگ پوائنٹ کے ہندوستانی حصے میں کور کمانڈر سطح کی بات چیت کا 15 واں دور منعقد کرنے کا فیصلہ کیا ہے۔اب تک بات چیت کے چودہ ادوار کے نتیجے میں پینگونگ تسو، گالوان اور گوگرا ہاٹ اسپرنگس کے شمالی اور جنوبی کنارے کے علاقوں کو حل کیا جا چکا ہے۔
پینگونگ تسو کے جنوبی کنارے، گالوان اور گوگرا گرم چشمہ کے علاقے پر بات جیت ہوچکی ہے ۔دونوں فریق اب دیگر علاقوں کو حل کرنے پر توجہ مرکوز کریں گے۔ باہمی طور پر قابل قبول حل تلاش کرنے کے لئے دونوں فریقوں کے حالیہ بیانات حوصلہ افزا اور مثبت نوعیت کے ہیں ۔ دونوں ممالک کے درمیان کور کمانڈرز کی بات چیت کا 14واں دور رواں سال جنوری میں ہوا تھا۔ سرحدی مسئلے کو حل کرنے کے لیے پیپلز لبریشن آرمی کے ساتھ مسلسل بات چیت کے دوران ہندوستانی فوج نے آپریشنل تیاریوں کی اعلیٰ سطح کو برقرار رکھا ہوا ہے۔
بات چیت پیٹرولنگ پوائنٹ 15 (ہاٹ اسپرنگ) پر تنازعہ کو حل کرنے کے لیے ہو گی۔ جنوری میں چین نے نیا سرحدی قانون نافذ کیا اور اپنے نقشے پر اروناچل پردیش کے 15 مقامات کا نام بھی بدل دیا۔اس کے علاوہ چین نے اس سال کے شروع میں مشرقی لداخ میں پینگونگ جھیل کے ایک حصے پر ایک پل کی غیر قانونی تعمیر کی تھی۔ ہندوستان اس سرگرمی پر کڑی نظر رکھے ہوئے ہے۔چینی پینگونگ جھیل کے شمالی اور جنوبی کناروں کو ملانے والے پل کی تعمیر کر رہے ہیں۔ یہ پل پینگونگ جھیل کے شمالی اور جنوبی کناروں کو جوڑتا ہے اورچینی پیپلز لبریشن آرمی کو دونوں اطراف تک فوری رسائی کی اجازت دے گا۔ہندوستان اور چین کے درمیان تقریباً دو سال سے سرحدی تنازعہ چل رہا ہے۔
